दुरशेत –पेण (अजय शिवकर) पेण तालुक्यातील दूरशेत येथे एक धक्कादायक घटना उघडकीस आली आहे...एका निर्जन ठिकाणी, आड रस्त्यावर, सुटकेसमध्ये भरून एका अज्ञात महिलेचा मृतदेह टाकण्यात आल्याचे आढळून आले... या घटनेने संपूर्ण परिसरात खळबळ उडाली आहे....
गेल्या काही दिवसांपासून या सुटकेसची उपस्थिती स्थानिकांच्या लक्षात आली होती. मात्र, सुरुवातीला कोणीही तिच्याकडे विशेष लक्ष दिले नाही. नागरिकांना वाटले की कोणीतरी जुनी बॅग फेकून दिली असेल. मात्र, काही दिवसांनंतर बॅगमधून दुर्गंधी येऊ लागल्याने नागरिकांना संशय आला.
बॅगमधून येणारा वास सहन न झाल्याने काही नागरिकांनी त्वरित पेण पोलीस स्टेशनशी संपर्क साधला. त्यानंतर, पोलिसांनी घटनास्थळी धाव घेतली आणि संशयास्पद बॅग उघडून पाहिली. सुटकेसमध्ये एका अज्ञात महिलेचा मृतदेह आढळून आला. या प्रकाराने पोलीसही हादरले.
सोमवार दिनांक 10 मार्च रोजी, पोलिसांनी मृतदेह ताब्यात घेतला आणि पुढील तपासासाठी तो पेण येथील सरकारी उपजिल्हा रुग्णालयात पाठवला. शवविच्छेदन अहवालानंतर मृत्यूचे कारण स्पष्ट होईल.प्राथमिक तपासात ही हत्या असल्याचा संशय व्यक्त केला जात आहे... मात्र, अद्याप कोणतीही ठोस माहिती हाती आलेली नाही... पोलिसांनी परिसरातील सीसीटीव्ही फूटेज तपासण्यास सुरुवात केली असून, मृत महिलेची ओळख पटवण्याचा प्रयत्न सुरू आहे.या प्रकारामुळे दूरशेत आणि आसपासच्या गावांमध्ये भीतीचे वातावरण पसरले आहे. नागरिकांमध्ये या घटनेबद्दल मोठी चर्चा असून, पोलिसांनी आरोपीचा जलद शोध घ्यावा, अशी मागणी केली जात आहे...या घटनेचा अधिक तपास पेण पोलीस स्टेशनकडून सुरू असून, लवकरच या प्रकरणाचा खुलासा होण्याची शक्यता आहे...