मुबंई प्रतिनीधी:(सतिश वि.पाटील) :महाराष्ट्रातील एकमेव विद्यार्थिनी! पिंपरी-चिंचवड महापालिकेच्या शाळेत शिक्षण घेतलेल्या श्रावणी टोणगे हिला जर्मनीत उच्च शिक्षणाची सुवर्णसंधी मिळाली आहे.महाराष्ट्रातून ही संधी मिळवणारी श्रावणी एकमेव विद्यार्थिनी ठरली
पिंपरी : पिंपरी-चिंचवड महापालिकेच्या शाळेत शिकलेल्या श्रावणी टोणगे हिने आपल्या प्रतिभेच्या जोरावर आंतरराष्ट्रीय स्तरावर मोठी झेप घेतली आहे. कासारवाडीतील छत्रपती शाहू महाराज इंग्लिश मीडियम स्कूलमध्ये शिक्षण घेणाऱ्या श्रावणीची निवड प्रतिष्ठित युनायटेड वर्ल्ड कॉलेज (UWC) रॉबर्ट बॉश कॉलेज, जर्मनी येथे झाली आहे. येत्या 28 ऑगस्टपासून सुरू होणाऱ्या शैक्षणिक सत्रात तिचा प्रवेश निश्चित झाला असून, श्रावणीला 100 टक्के शिष्यवृत्ती मिळाली आहे. विशेष म्हणजे, महाराष्ट्रातून या वर्षी ही संधी मिळवणारी ती एकमेव विद्यार्थिनी ठरली आहे...
श्रावणीने दहावीपर्यंतचे शिक्षण महापालिकेच्या शाळेत घेतले. तिच्या शालेय कारकिर्दीतच तिची बुद्धिमत्ता, मेहनत आणि चिकाटी सतत ठळकपणे जाणवली. शिक्षकांचा मार्गदर्शन, स्वतःची जिद्द आणि पालकांचा पाठिंबा यामुळे तिने अवघ्या मर्यादित साधनांमध्येही उत्कृष्ट प्रगती साधली. दहावीच्या परीक्षेत तिने तब्बल 93 टक्के गुण मिळवत उत्तम यश मिळवले. याच कामगिरीच्या जोरावर आणि तिच्या सर्वांगीण विकासामुळे तिला जर्मनीत अकरावी-बारावीचे शिक्षण घेण्याची सुवर्णसंधी मिळाली आहे...
पुढील दोन वर्षे श्रावणी विज्ञान, गणित, अर्थशास्त्र यांसारख्या विषयांचा सखोल अभ्यास करणार आहे. UWC संस्थेत मिळणारे शिक्षण केवळ शैक्षणिकच नाही, तर जागतिक नागरिक घडवण्यावर भर देते. विविध देशांतील विद्यार्थी एकत्र येऊन शिक्षण घेत असल्याने आंतरराष्ट्रीय पातळीवर संवाद, संस्कृतीची देवाणघेवाण आणि जागतिक समस्यांवर विचार करण्याची संधी श्रावणीस मिळणार आहे. त्यामुळे तिचा दृष्टीकोन व्यापक होणार असून, तिच्या भावी कारकिर्दीत हे पाऊल महत्वाचे ठरणार आहे.शाळा कोणती हे जरूरी नाही तर जिद्द आणि चिकाटी बुध्दीमत्ता यावर अवलंबून आहे. तरुणांना प्रेरणादाई ठरेल...