अलिबाग प्रतिनिधी
अलिबाग नगरपालिका प्रशासकांचा मनमानी कारभार. संजय सावंत यांची जिल्हाधिकारी यांच्याकडे तक्रार.
अलिबाग येथील दर्यासारंग सरखेल कान्होजी आंग्रे समाधी परिसर सुशोभीकरणासाठी समाधीला संरक्षक भिंत बांधणे रू. ५ कोटीच्या कामाचे नियमबाहय तुकडे करून अलिबाग नगरपालिकेच्या प्रशासकांनी प्रसिध्द केलेल्या निविदा रद्द करून सर्व कामासाठी एकच निविदा काढून कामाचा दर्जा चांगला ठेवण्यासाठी जिल्हाधिकारी यांनी आदेश करावेत अशी मागणी अलिबाग येथील सामाजिक कार्यकर्ते संजय सावंत यांनी केली आहे... प्रशासकांचा मनमानी कारभार सुरू असल्याचा आरोप संजय सावंत यांची जिल्हाधिकारी यांच्याकडे केलेल्या तक्रार अर्जात केला आहे...विशेष म्हणजे तीनही निविदांची अंदाजपत्रके आंग्रे समाधीला संरक्षक भिंत बांधणे यासाठीच करण्यांत आली आहेत...
दर्यासारंग कान्होजी आंग्रे यांना अलिबाग व रायगडवासी हृदयामध्ये मानाचे स्थान
जिल्हाधिकारी व कोकण आयुक्त यांच्याकडे केलेल्या तक्रार अर्जात सावंत यांनी अलिबाग येथील दर्यासारंग कान्होजी आंग्रे समाधी परिसर सुशोभीकरण करणे समाधीला संरक्षक भिंत बांधणे या कामासाठी शासनाच्या विविध विभागाकडून रू. ५ कोटी ७लाख २५ हजार निधी प्राप्त झाला असल्याचे नमूद केले आहे...दर्यासारंग कान्होजी आंग्रे यांना अलिबाग व रायगडवासी हृदयामध्ये मानाचे स्थान आहे...
अलिबाग नगरपरिषद यांनी ५कोटी ७लाख २५ हजार निधीचे तीन भाग करून निविदा केल्या प्रसिध्द
शासनाच्या विविध विभागाकडून रू. ५ कोटी ७ लाख २५ हजार निधी प्राप्त झाला असल्याने या कामासाठी एकच टेंडर प्रसिध्द करून दर्जेदार पध्दतीने काम होणे गरजेचे होते...असे असताना मुख्याधिकारी अलिबाग नगरपरिषद यांनी दि. २८ ऑगस्ट २०२३ च्या स्थानिक वर्तमान पत्रात रू. ५कोटी ७लाख २५ हजार निधीचे तीन भाग करून अनुक्रमे रू. २,५२,८६,९६२/-, रू. १,२७,१९,०३९ व रू. १,२७,१९,०३९असे तीन भाग करून तीन निविदा प्रसिध्द केल्या आहेत...या निविदा सावंत यांनी पीडीएफ फॉरमॅटमध्ये जिल्हाधिका-यांना पाठविल्या आहेत...
एकाच कामाची गुणवत्ता ठेवण्यासाठी भ्रष्टाचार कमी करण्यासाठी एका कामाचे तुकडे करण्यावर बंदी
वास्तविक शासनाच्या निकषानुसार एकाच कामाची गुणवत्ता ठेवण्यासाठी व भ्रष्टाचार कमी करण्यासाठी कोणत्याही परिस्थीतीमध्ये एका कामाचे तुकडे करण्यावर बंदी आहे..सावंत यांनी याबद्दल मुख्याधिकारी अलिबाग नगरपरिषद अंगाई साळुंखे यांच्याकडे संपर्क साधला असता त्यांनी निधी वेगवेगळया हेडमधून आला असल्याने तीन निविदा काढाव्या लागल्या असे स्पष्टीकरण दिले...सावंत यांना हे स्पष्टीकरण मान्य नसल्याने त्यांनी जिल्हाधिका-यांकडे तक्रार अर्ज केला आहे..निधी वेगवेगळया लेखाशिर्षाखाली असला तरी तो अलिबाग येथील दर्यासारंग कान्होजी आंग्रे समाधी परिसर सुशोभीकरण करणे (समाधीला संरक्षक भिंत बांधणे) या एकाच कामासाठी असल्याने स्थळाचे ऐतिहासीक महत्व व कामाचा दर्जा गुणवतापर्वूक तसेच भ्रष्टाचारमुक्त असण्यासाठी एकच निविदा प्रसिध्द करणे आवश्यक होते असे मत सावंत यांनी मांडले आहे...
आंग्रे समाधी परिसर सुशोभीकर काम गुणवत्तापूर्वक होण्यासाठी जिल्हाधिकाऱ्यानां विनंती
अलिबाग नगरपरिषदेच्या प्रशासकांचा हा निर्णय विविध ठेकेदारांना फायदा मिळवून देण्यासाठी असल्याचे प्रतीत होत असल्याने जिल्हाधिकारी यांनी तात्काळ या निविदा प्रकीयेवर स्थगीती देवून ५ कोटींची नवीन निविदा प्रक्रीया प्रसिध्द करण्याचे आदेश देवून अलिबाग येथील दर्यासारंग कान्होजी आंग्रे समाधी परिसर सुशोभीकरण करणे..समाधीला संरक्षक भिंत बांधणे, हे काम गुणवत्तापूर्वक होण्यासाठी प्रयत्न करावेत अशी विनंती जिल्हाधिकारी यांना केली आहे...
अलिबाग नगरपालिका प्रशासकांची प्रतिक्रीया.
निधी वेगवेगळया हेडमधून जसे की पर्यटन विभाग, विशेष प्रस्तावित कामे अशा प्रकारे आला असल्याने तीन निविदा काढाव्या लागल्या...यामध्ये अनियमितता झालेली नाही...अंगाई साळुंखे,मुख्याधिकारी,अलिबाग नगरपरिषद.